Европа космос агенттигинин (ESA) Proba-3 миссиясынын алкагында бул жумада эки спутник катасыз синхрондошкон абалда учуу боюнча чоң жетишкендикке жетишти. Башкача айтканда, эки космостук аппарат Күнгө карата автономдуу түрдө өз формациясын сактап, Жердеги көзөмөл борборунан буйрук албай, бир нече саат бою туруктуу абалда учуп жүрүштү.
Бельгиянын Реду шаарындагы Европа космос агенттигинин (ESA) Европалык Космос Коопсуздугу жана Билим берүү Борборунда (ESEC) инженерлер эки спутниктен келген телеметриялык маалыматтарды, коддорду жана түз убакыттагы диагностикалык маалыматтарды көзөмөлдөп турушту.
Proba-3 — спутниктердин так жайгашуусуна багытталган биринчи миссия. Бул долбоордо эки спутник — Коронаграф жана Оккультер — 150 метр аралыкта бирге иштейт. Бул система космосто чоң обсерваториянын кичинекей үлгүсү сыяктуу.
Оккультер өзүнүн 1,4 метрлик диски менен Коронаграфка так көлөкө түшүрөт. Бул көлөкө Коронаграфка Күндүн сырткы катмарын (коронасын) күн нурун тоспой эле изилдөөгө мүмкүнчүлүк берет.
Жерден берилген буйруктар менен спутниктер 600 метр аралыктан 144 метрге чейин жакындатылды. Ошол эле учурда алар Күндүн көлөкөсүнө туура келгидей жайгаштырылды. Андан кийин спутниктер өз алдынча иштөөгө өттү.
Башка миссияларда да спутниктер бирге иштеген учурлар болгон, бирок Proba-3 миллиметрлик тактык менен өз алдынча узак убакыт иштей алган биринчи миссия.
Миссиянын менеджери Дамиен Галано мындай деди:
“Биз адегенде GPS аркылуу спутниктердин ордун так аныктадык. Андан соң кыймылдаткычтар аз гана күйүүчү май сарптап, спутниктерди 144 метр аралыкта так жайгаштырды. Өз алдынча иштөө режими башталганда, спутниктер камералар жана жарыктар аркылуу өз абалын көзөмөлдөй баштады. Жайгашууда ката кетсе, система өзү кичине оңдоолорду жасайт.”
Ал эми системалык инженер Теодор Божанов буларды кошумчалады:
“Спутниктер бири-бири менен байланышып, маалымат алмашып турат. Биз жөн гана байкап турдук, аралашкан жокпуз. Көлөкөнү туура түшүрүү үчүн атайын сенсорлар колдонулат. Бул спутниктерди Күндүн багытына ылайыкташтырат.”
Дагы бир системалык инженер Эстер Бастида Пертегаз мындай деди:
“Акыркы эки күндө биз көп маалымат чогулттук. Бул маалымат системаны жакшыртуу үчүн колдонулат. Жакынкы жумаларда дагы сыноолор болот, жана Proba-3 дүйнөдөгү эң так жайгашуу миссиясына айланат.”
ESA өкүлү Ноэлия Пейнадонун маалымдашынча, бул сыноодо алар тактыкка жана автономдуулукка басым кылышкан.
“Бул миссиянын эң маанилүү сөздөрү — ‘тактык’ жана ‘өз алдынча иштөө’. Proba-3 келечектеги космос долбоорлору үчүн жаңы технологияларды сынап жатат. Бул он жыл мурун мүмкүн эмес эле, эми болсо биз аны ишке ашырып, келечектеги чоң миссияларга жол ачып жатабыз”, – деди Ноэлия Пейнадо.
Шилтемелер:
Сүрөт: Proba-3 инфографикасы: Күн менен бир сызыкка тизилүү. Европа космос агенттигинин сайтынан алынган сүрөт.
